Քառասնօրեայ Պահեցողութեան Հոգեպարար Արարողութիւններ` Անթիլիասի Մայր Տաճարին Մէջ
Հայ առաքելական եկեղեցին երկուշաբթի, 11 փետրուարին մուտք գործեց Մեծ պահոց քառասնօրեայ
ժամանակաշրջանը, որ եկեղեցւոյ հայրերուն կողմէ սահմանուած սքանչելի առիթ է ինքնաքննութեան
եւ ինքնասրբագրումի: Անցնող տարիներու աւանդութեան համաձայն, Անթիլիասի Ս. Գրիգոր
Լուսաւորիչ Մայր տաճարին մէջ, հանդիսապետութեամբ Արամ Ա. կաթողիկոսին, տեղի պիտի ունենան
Արեւագալի ժամերգութիւնները, ամէն չորեքշաբթի եւ ուրբաթ առաւօտեան ժամը 7:00-ին, իսկ
Հսկումի արարողութիւնները` ամէն չորեքշաբթի եւ ուրբաթ երեկոյեան ժամը 5:00-ին: Դարձեալ
անցնող տարիներու աւանդութեան համաձայն, հաւատացեալ ժողովուրդը ի՛նք պիտի կատարէ երգեցողութիւնը`
Քրիստոնէական դաստիարակութեան բաժանմունքին կողմէ պատրաստուած յատուկ ժամագիրքերուն հետեւելով: Յայտնենք,
որ ամէն չորեքշաբթի առաւօտ, Արեւագալի արարողութեան աւարտին, Մայր տաճարին մէջ հոգեւոր
խորհրդածութիւններ պիտի կատարեն Մեծի Տանն Կիլիկիոյ կաթողիկոսութեան միաբան հայրերը: